ESTE VENRES, DÍA 23 DE SETEMBRO: FESTIVIDADE DE SANTA TREGA, AVOGADA DA CABEZA E DO CORAZON
A imaxe de Santa Trega, portada por devotas de A Guarda, achégase a porta da ermida
Fotos: Arquivo Ricardo Rodríguez Vicente
Fotos: Arquivo Ricardo Rodríguez Vicente
Ricardo Rodríguez Vicente / A Guarda
A poboación da Guarda prepárase para a celebración
da festividade de Santa Trega, que terá lugar este venres día 23 de setembro - festivo local no termo municipal de a Guarda -, no incomparable cume do monte sacro que leva o nome desta santa
natural de Iconio.
Seguindo a convocatoria da multisecular Irmandade
do Clamor, os devotos de Santa Trega, comenzarán a subida cara á
súa ermida ó alborear o día, para reza-lo Santo Rosario, efectuar ofrendas de
flores nos Vía Crucis e posteriormente asistir ás misas que se oficiarán ás
8:00, 9:00 e 10:00 h..
A eucaristía solemne, que estará presidida polo Prior
da Irmandade do Clamor, e contará coa asistencia de diferentes autoridades do
Rosal e da Guarda, dará comezo ás 11:00 da mañá.
Ao termo da celebración eucarística, terá lugar a
procesión, na que participarán numerosas persoas de toda a comarca do Baixo
Miño, algunhas das cales portan diversas ofrendas en especie que tras devolver
a imaxe de Santa Trega o seu sitial no interior da capela, serán poxadas no
púlpito ao aire libre, próximo ao Piñeiral da Santa.
Froitos do agro e do mar para "a poxa dos froitos", de Santa Trega
Peixe de coiro, viños e licores de produción
artesanal, mariscos, froitas, hortalizas - maioritariamente ristras de cebolas
da Cruzada -, espigas "raíñas", tapetes, maquetas de gamelas,
sobremesas caseiras,..., previamente ofrecidos á santa, seguindo a antiquísima tradición
diezmal, serán pública e rápidamente poxados, na "poxa dos froitos".
Un evento que adoita congregar a centos de persoas, que moitas delas seguen ese
ritual ata seu remate.
"Regueifa", ou Tarta de Santa Trega
Ao termo da poxa tamén será sorteada a "Regueifa",
ou Tarta de Santa Trega, que adoita levar un grato
agasallo sorpresa para a persoa afortunada. Toque ou non toque o agasallo,
achégase o intre no que algunhas familias adoitan escomenza-lo xantar ó aire
libre.
A hora de xantar, sería toda unha mostra de civismo,
que ninguén se situase no interior do poboado galaico-romano, para evitar, no
posible, os danos que en ocasións se producen no xacemento arqueolóxico,
especialmente nas estructuras descubertas.
Se como se prevé e é de desexar, a climatoloxía é favorable, os
romeiros tras pasar a maior parte do día no cume do Monte Santa Trega, irán
baixando a media tarde para tomar posicións no Parque do Cancelón (O Montiño),
onde terá lugar a merenda-cea e probablemente, un animado baile popular,
amenizado por algún grupo de gaitas da Guarda, que espontáneamente porá no ar súas
notas musicais, convidando a todos a gozar dos seus compases.
Ningún comentario:
Publicar un comentario