CINEMA
Cinema + Perto 2017
“Filmes do Costiña”
Apresentação de filmes feitos em A Guarda, Galiza nos anos 20 do século passado
Martes 8 de agosto, ás 22:00 h. no Auditório do Museu Municipal de Caminha
Locus Cinemae / Caminha
Recordando a
Joaquín García Portela:
fotógrafo e
pioneiro do cinema na Guarda
Joaquín García Portela, na súa labor de operador de cabina no Cine-Teatro "Avenida", de A Guarda
Foto: Arquivo Celia e Joaquina Martínez García
Cando xa se daban por perdidos desde facía
polo menos uns 20 anos, ás circunstancias quixeron que os filmes que no
primeiro cuarto do século XX fixera Joaquín García Portela (1894-1957) fosen
reencontrados a finais do 2014. Son oito rolos de películas de formato 9,5 mm.
O achado produciuse fortuitamente, cando dúas das súas netas Joaquina e Celia,
e María, unha das súas bisnetas, estaban limpando o faiado da casa. Logo desa
boa nova, contactaron con Xurxo González Rodríguez, de Proxecto Socheo, para
darlle á coñecer esa boa nova e ver á posibilidade de dixitalizar eses filmes.
Este feito foi o detonante para emprender a realización dunha homenaxe para
resaltar a súa memoria. Pero convén saber algo máis sobre o autor dese tesouro
cinematográfico que ten case un século de antigüidade e para iso haberá que
tecer e ordenar os fíos da súa biografía.
Joaquín García Portela, foi fillo de José Bernardo e de Florinda, naturais
da Guarda e de Salcidos, respectivamente. Naceu o día 18 de febreiro de 1894,
na Guarda, na vivenda familiar sita no número 25 de Solanas.
Foi o primoxénito dos dous fillos que tivo o matrimonio. Cursou súas
primeiras letras na escola do gratamente relembrado mestre Manuel Rodríguez
Sinde.
Joaquín García foi un fotógrafo autodidacta guardés, coñecido tamén polo
sobrenome “Costiña”, herdado de seu padrasto, xa que súa nai casou en segundas
nupcias, con un portugués alcumado Costinha. Os seus descendentes tamén levan con
orgullo este alcume como homenaxe e lembranza a ese ser humano tan especial,
como foi Joaquín García Portela.
Joaquín casou con Florinda Ferreira Portela e tiveron tres fillos: Celia,
Consuelo e José. O pequeno, chamado Pepiño no ámbito familiar, faleceu
prematuramente, cando contaba so con 13 anos de idade. Esa circunstancia foi,
sen dúbida, un dos episodios máis dolorosos na vida do noso protagonista.
Moi afectado polo revés que lle supuxo, tanto para el como para toda á
familia, Joaquín García compuxo o seguinte poema de duelo, dedicado o recordo
póstumo de José García Ferreira:
Pepiño hijo querido,
tu recuerdo es mi consuelo.
Tienes el alma de ángel
por eso volaste al Cielo.
Si Dios te quiso llevar
fue por alguna razón,
así como te llevamos
todos en el corazón.
Eses versos elexíacos trasladounos a unha lápida temporal que Joaquín
García fixo, e que cada ano, nas vésperas do 1º de novembro, colocaba no
frontal do nicho familiar, no cemiterio parroquial de Salcidos, onde fora
sepultado seu fillo. E alí permanecía esa lápida o longo de todo o mes de
defuntos, retirándoa o rematar ese mes, e volvendo a colocala nos anos
seguintes.
Joaquín tivo seus estudos fotográficos, primeiro na casa familiar en Laxe
Grande e posteriormente na rúa Concepción Arenal, a beira da Praza de Abastos.
En ámbolos dous emprazamentos, fotografou a milleiros de persoas de toda
condición social, procedentes da Guarda e súa contorna: O Rosal, Oia, Goián,…
Fixo fotografías de carnet, vodas, primeiras comuñóns, grupos de alumnos do Colexio
dos Xesuitas da Pasaxe (Camposancos), xogadores de fútbol dos equipos da Guarda
daquel entón (Deportivo Guardés, Cidadáns, San Lorenzo, …), fotografías de
estudo para levar na carteira, postais da Guarda, recunchos da vila guardesa,
grupos de persoas disfrazadas polo Entroido, atadeiras reparando as redes, as
gamelas que saían “ao axexo”,… Tamén fotografou a Charanga do Tío Remigio e o
dirixible do Conde Ferdinand Von Zeppelin, sobrevoando o ceo da Guarda.
Ademais dos traballos habituais dun retratista, Joaquín García tamén fixo
fotografías que podemos encadrar no apartado artístico, tendo como modelos,
maioritariamente, a súa dona, Florinda, a súas fillas, Celia e Consuelo, e aos
seus netos.
Joaquín García Portela foi un home polifacético. Estando solteiro, emigrou
a Buenos Aires onde traballou de mecánico. Ao retornar, traballou de latoeiro
e, tamén, de chofer. Ao longo de uns 22 anos conduciu o Buick e o Dodge que
tiñan a familia de Manuel Otero Lomba “O Potiño” e súa esposa Joaquina Juana
Sobrino Alonso. Esta muller foi a madriña das súas fillas polo que no ámbito
familiar recibía o denominación cariñosa de Doña Joaquinita. Da óptima relación
que tiña con este matrimonio son boa proba seis tarxetas postais, escritas e
asinadas por Manuel Otero Lomba, que llas enviou a Joaquín García, desde
Madrid, Zaragoza, Barcelona, Valencia e Granada, entre os días 6 de novembro e
10 de decembro de 1929, respectivamente.
Na primeira das tarxetas postais figura o seguinte texto:
“Estimado Joaquín: Ayer por la mañana llegamos sin novedad y continuamos lo
mismo. Puedes decirle al amigo Builla que hemos visto el cine hablado y sonoro,
resultando una sesión superior. Mañana pensamos salir para Zaragoza. Dile a las
muchachas que estamos bien y dale nuestros recuerdos.
Recíbelos tu muy afectuosos de tu affmo. y S.S.
Manuel Otero
Madrid, Noviembre 6 de 1929
Durante 27 anos, Joaquín García Portela foi operador de cinema no
Teatro-Cine Ideal. Unha sala que era propiedade de Adolfo A. Builla (referido
na devandita tarxeta postal). E posteriormente, desde 1941, foi proxeccionista
do Teatro-Cine Avenida. Este traballo o simultaneaba co oficio de chofer. Pero
os seus desempeños profesionais non quedaron aí e tamén arranxaba e montaba
aparellos de radio e foi pirotécnico, ademais do seu labor arduo como fotógrafo,
que exerceu practicamente até seu falecemento. Este feito lutuoso aconteceu na
súa vivenda familiar, na rúa Concepción Arenal, da vila da Guarda, o 14 de
xullo de 1957.
Se nos detemos na súa traxectoria fotográfica, sabemos que Joaquín García
Portela investigou con teima a procura da cor. Como daquela aínda non se
inventaran os carretes de cor, compre ter en conta que a verdadeira fotografía
en cor xurdiu en 1935, cando Kodak e Agfa, comezaron a vender súas películas con
emulsión de tres capas, el mesmo chegou a aplicarlle cor as súas copias
fotográficas, empregando anilinas e mesmo pintura ao óleo. Iso acredita que era
unha persoa con inquietudes técnicas e de espírito innovador.
Como negativos empregou tanto placas fotográficas de vidro, coa técnica do
colodión, como negativos de celuloide. O material mercábao nos establecementos
Foto Club e Fotomecánicos, ambos os dous de Vigo.
Ademais do traballo no seu laboratorio, adoitaba lavalas fotografías na
Fontiña, de Aldramán, preto das Casetas de Baños, como se lles denominaba
popularmente, a aquelas modestas instalacións, pioneiras da talasoterapia no
municipio da Guarda, que foron rexentadas, ao longo de varios anos, por
Casimiro Vicente Peniza.
Na devandita labor de lavado das fotografías na Fontiña, xa positivadas en
papel, o fotógrafo pasaba unhas 2 ou 3 horas. E logo tíñaas 24 horas máis,
renovándolles as augas. Posteriormente colgábaas nun cordel, suxeitas con
pinzas da roupa, para o proceso de secado, de vagar. Grazas a ese xeito de
traballo, totalmente artesanal, súas fotografías aínda se manteñen incólumes
hoxe en día.
Joaquín era máis fotógrafo de estudo que de rúa. Para acadar uns óptimos
resultados adoitaba retocar. Facíao desde o propio negativo de vidro ou película
fotográfica, nun traballo minucioso. No caso dos negativos de vidro empregaba
un lapis afiado e acedo, e no caso dos negativos de celuloide, un alfinete. Na
fase posterior ao positivado seguía buscando con esmero o mellor dos acabados.
No referente o revelado dos negativos e do papel fotográfico,
respectivamente, Joaquín García tiña seu propio método, que por ser moi persoal
non imos desvelar, para o control dos tempos necesarios en todo o proceso,
segundo ás indicacións do fabricante dos produtos. E os resultados eran
óptimos. Celia, a súa filla primoxénita, comentaba sobre o traballa do seu pai
que “era tan meticuloso no seu traballo
que non se permitía o máis mínimo erro. Ningún detalle que puidera mellorarse o
deixaba ao azar”.
No libro Antes e agora. Unha visión de como era a vida en
Galicia hai 60 anos (A Guarda e Caldas de Reis) vista por un neno e contada por
un vello, de
Emilio Rolán Mosquera, hai unhas páxinas, concretamente ás
correspondentes o capítulo XVIII, titulado “As fotos”, onde o autor evoca a
figura de Joaquín García aínda que non o chega a identificar, quizais porque
daquela, sendo un rapaz, non sabía seu nome, e faino do seguinte xeito:
“Xa sei que tedes montóns de fotos e que non che preocupa que che fagan ou
non fotos nun momento determinado: telas de cando eras pequeno, de diversas
etapas do crecemento, dos “cumpres” cos teus amigos, do cole, das festas, con
teus pais, cos avós, en aquel viaxe a Barcelona, etc., etc., tes montóns.
Ademais telas todas a cores, algunhas chas deron, outras imprimiunas teu pai
dende o ordenador en diversos tamaños, tes fotos dos teus amigos, incluso fotos
dixitais que envías polo Natal os teus primos de América e sabes que no
ordenador podes ver fotografías de moitos momentos da túa vida. Ata pode que teñas
algunha foto colgada en Internet por calquera motivo. Tamén ves que calquera
persoa que vai de viaxe leva unha cámara dixital e fai montóns de fotos sen
problema ningún.
Ben, xa sabes que a fotografía é un
invento moderno. Seguramente viches nos libros ou nalgún museo cadros dos reis
de séculos anteriores. Sabes tamén que, como entón non había fotos, os reis e
os grandes personaxes gardaban as súas imaxes grazas a que un pintor facía
aqueles retratos ao óleo que se conservaban durante séculos.
Pero a miña infancia é un período entre
esa época, en que non había fotos, e a actual, na que as fotos son algo común
de cada día e fanse con facilidade. Preguntácheste algunha vez como era, con
relación a fotografía, aquela época intermedia da miña infancia e un pouco
antes ou un pouco despois?
Cando eu era neno xa existía a
fotografía pero a xente non tiña cámaras. Había un fotógrafo no pobo, e facer
fotos era a súa profesión, vivía diso, e o que quixese facer un retrato tiña
que ir a súa casa. Aí tes outra profesión que ten mudado moito.
Vouche contar un día no que nos fixeron
unha foto aos meus irmáns e a min. Empezamos levantándonos moi cedo; despois
toda a familia dedicouse a poñernos guapos, lavándonos repetidas veces e
vestíndonos cos mellores traxes. Peiteáronnos moi ben, consultándose uns cos
outros en col de se había que pór o pelo máis adiante ou non. Por fin chegaron
a un consenso sobre o noso aspecto a saímos da casa. Tivemos que andar un bo
rato e sempre nos ían dicindo:
-Coidado, non corrades, non toquedes
nada nin vos toquedes a cabeza, mira que levamos toda a mañá arranxándovos.
Por fin chegamos a casa do fotógrafo,
polo camiño das Casetas, unha zona preto do mar, fronte ó peirao, onde se
tomaban baños de auga con algas.
Chamamos, recibíronnos, dixemos ó que
íamos e esperamos un pouco. Por fin apareceu o fotógrafo secándose as mans
cunha toalla, facendo unhas reverencias de “salutación” e estreitando a man dos
nosos acompañantes. A nós, os rapaces, limitouse a acariñarnos a fazula (o
pelo, probablemente non quixo tocalo pois supuxo que xa viña preparado para a
foto...!). E pasounos a sala onde tiña o aparello de facer os retratos.
Este non me impresionou, era coma unha
caixa grande, aparentemente de madeira, sobre unhas patas longas, que tiña por
diante como un miradoiro tapado con algo que máis ben parecía un vasiño de
metal ou de cartón, e por a parte de atrás había unha tela, coma unha manta que
lle colgaba. Alí, baixo da manta, introducía as mans o fotógrafo para preparar
as cousas e de vez en cando a cabeza (probablemente cando quería ver se estaba
todo ben). Polos arredores tamén tiña caixas con cristais rectangulares, moitos
deles con figuras en negativo. O misterio estaba debaixo da manta: alí
preparaba as cousas, metía e sacaba materiais que parecían como uns recipientes
con líquidos e tamén cristais; coido que estes cristais tiñan unha cuberta
especial feita cunha pasta química que cambiaría de cor cando a luz lle dese
(isto contáronmo máis tarde). En medio dun gran silencio foise preparando a foto
e dando comezo ó misterio de aquel acto case milagroso de conseguir reter,
fixada nun papel, unha imaxe das persoas que tiña enfronte. Aos rapaces (que
éramos as persoas a fotografar) íamos onde nos mandaban e puxéronnos diante da
máquina aquela. Logo o fotógrafo veu cara á nos e nos foi colocando, uns de pé,
o outro sentado, mirando a un lado ou para outro..., as mans así..., este pé
para este lado..., ata que o cadro que formabamos debía resultar equilibrado e
axeitado, segundo a súa opinión; despois dunha primeira colocación, o fotógrafo
afastábase, movía un pouco a cabeza de lado, quizais para ver a escena dende
outro punto de vista... e de novo achegábase e cambiábanos un pouco a posición
dunha man ou da cabeza. Despois, volvíase a chegábase ata a cámara, metía a
cabeza por debaixo da manta e observaba un rato. A continuación, saía de novo e
volvía a movernos outro pouco. Retrocedía e observábamos de lonxe con ollo
crítico. Chegaba, unha vez máis, ata a cámara e o obxectivo, e revisaba os
últimos detalles. Daba un derradeiro toque ao material fotografiable que
formábamos meus irmáns máis eu e, finalmente, pareceu como que quedou
satisfeito. De modo que se volveu a cámara e colocouse moi teso, mentres
mantiña un brazo por debaixo da manta e con outro suxeitando a cuberta do
obxectivo, díxonos:
-Atención, todos quedos durante un
momento!
Todos mirabámoslle con atención sen
pestanexar (o que coido que era moi necesario, e xa nos aleccionaran
previamente “non vos podedes mover nada, nada”) e entón coa man, retirou o
tapón da cámara, contou lentamente “uno, dous, tres”, e xa está. Xa te podías
mover. Todo o mundo deu un suspiro de alivio (ou de osixenación, forzados pola
apnea durante o tempo da foto). Mentres tanto, a nosa nai ou a nosa tía
preguntáronlle ao fotógrafo.
-Que? Haberá saído ben?
O fotógrafo puxo cara interesante e
murmurou mantendo o suspense:
-Imos ver... imos ver...
E empezou a mesturar líquidos e a mover
cousas, metendo a man detrás da manta da caixa de madeira e revolvendo un pouco
por alí, terminando por sacar un cacharro con líquido que levaba unha placa
dentro que púxoo debaixo da caixa cuberto con outra tapadeira e dixo:
-Hai que esperar 20 minutos. Volvede
para entón por ser hai que repetila.
Así que a nai a maila tía ou quen fose
que nos acompañaba, explicou:
-Ben, saímos un pouco a rúa porque estes
rapaces non hai quen os teña quedos. Volvemos nun rato.
Claro, había que esperar, porque se non
saíra ben había que repetir. Para iso era conveniente que, xa que víramos cos
traxes novos e moi ben peiteados, non nos descompuxésemos, por iso dábannos
novas ordes.
-Baixar a escaleira a modiño e na rúa
non quero que corrades nin que vos pelexedes.
A continuación, sometéronnos a un duro
marcaxe para conseguir ese obxectivo. Por fin, xa cansos, despois de 20 minutos
nos que case non nos deixaron facer case nada, volvemos a subir e novamente lle
preguntaron ao fotógrafo:
-Que? Xa se sabe como saíu?
E o fotógrafo volvía coa súa santa
parsimonia:
-Imos ver... imos ver...
Enredou un pouco co líquido e
finalmente, ante nosa expectación levantou un pouco o cristal, examinouno para
el mesmo durante uns segundos, sorriu abertamente e despois dixo con ton
triunfal:
-Está moi ben. Poden vir a buscala
dentro de unha semana.
Miña nai e miña tía respiraron aliviadas
e regresamos a casa.
Total: toda a mañá para prepararnos, ir
a casa do fotógrafo, facer a foto e voltar. E aínda había que volver dentro
dunha semana para recoller a ansiada imaxe en branco e negro, xa seca, en papel
cartulina, recortada, cos bordes dentados (como se estilaba entón) e conseguir
dúas copias ou tres. Pagábase o traballo e listo. Unha copia quedaba na casa
(aínda a teño), a outra envíase á familia de Caldas de Reis e a outra ós
familiares de América, que aínda non nos coñecían.
-Que che parece este proceso, rapaz? Ten
moito que ver co que facedes hoxe? Levantar unha cámara dixital, disparar con
todo automatizado e vela foto ao momento. E, ademais, despois, máis tarde,
podes pasala ao ordenador para vela en pantalla grande e, finalmente, imprimila
a cores se queres. A que é un cambio brutal?”
Ese interesantísimo e pormenorizado relato foi feito polo médico pediatra,
biólogo, malacólogo, escritor e pintor guardés, Emilio Rolán Mosquera.
Agradecemenos enormemente este testemuño e a súa desinteresada colaboración
connosco. O fotógrafo do que escrebe o Dr. Rolán é sen ningunha dúbida Joaquín
García Portela. Nesa lembranza reflicte en síntese, como era seu perfil humano
e o xeito de proceder no seu traballo fotográfico.
Asemade queremos transcribir unha síntese da referencia oral que no pasado
mes de febreiro de 2016 lle fixo María del Rosario Álvarez Sobrino, a Joaquina,
unha das netas do fotógrafo. Segundo seu
testemuño, seus pais e ela mesma, estiveron con Joaquín García, en varias
ocasións, para facerse fotografías. Rematada á labor inicial do retratista,
sentábanse a conversar, porque “(...) ao
teu avó Joaquín –díxolle María del Rosario a Joaquina– gustáballe moito conversar coa xente. Era unha persoa moi dialogante. E
ademais, á xente tamén lle gustaba escoitalo a el. Iso facíao non so connosco,
senón con outras persoas”. María del Rosario Álvarez, continuou a súa
lembranza: “cando ían persoas adultas
cos seus fillos, despois de facerlles ás fotografías, ás persoas maiores íanse
e os nenos quedábanse co fotógrafo, escoitándoo como lles contaba cousas.
Joaquín García era moi bo, cariñoso e sensible. Tiña unha educación exquisita i
era moi delicado. Gustáballe moitísimo ler”.
O noso fotógrafo tiña varias cámaras fotográficas, entre elas, no seu
estudo, unha gran cámara clásica, de madeira, con mecanismos basculantes e
obxectivo de latón, que, logo da súa xubilación, cedería o fotógrafo José
Gardeázabal Rivas. Tamén tiña unha Zeiss Diax, fabricada en Alemaña por Walther
Voss; unha Kodak de fol, fabricada en EE. UU. e unha Zeiss Ikon 4 x 6 réflex,
tamén de fol, fabricada igualmente en Alemaña. Asemade, contaba cun trípode de
madeira, para fotos en exteriores. El mesmo preparou varios accesorios, incluso
ampliadoras horizontais, cámaras de estudo e unha positivadora que aproveitaba
a iluminación natural, a través dun espello, que situado preto da fiestra,
introducía a luz no seu estudo fotográfico.
Tiña tamén unha cámara e un proxector, do sistema de cinema mudo en casa
Pathé Baby, fabricados por Pathé Frères, en París (Francia). Como cineasta
amadorista, foi pioneiro da chamada Sétima Arte no pobo da Guarda. Nos anos
1926 – 1930, fixo varias películas de cinema mudo, que logo proxectaba no seu
fogar cos seus familiares. Neses filmes ás protagonistas principais son súas
fillas Celia e Consuelo que, aínda sendo daquela moi noviñas, atenden ás
indicacións que desde detrás da cámara lles fai seu pai. Como comprobamos logo
da dixitalización levada a bo termo en 2015, os filmes conteñen pequenas
historias guiadas polos intertítulos, con imaxes dunha tenrura sen igual, sobre
de todo porque cos seus sorrisos, as pequenas transmiten un mundo de simpatía e
de agarimo.
Hai tamén imaxes que non teñen carácter familiar, que reflicten persoas e
actividades moi heteroxéneas (atadeiras, pescadores, procesión da Virxe da
Guía, Romaría de Santa Trega), varios lugares do termo municipal da Guarda
(Sucampo, Sete Camiños, Barrio Novo, O Castro, ...), e mesmo de Vigo (do porto
do Berbés). Senón fora por esa labor oportunamente desenvolvida por Joaquín
García Portela e que súa familia soubo conservar ese patrimonio documental,
perderíase unha parte da nosa memoria colectiva como pobo.
Varios anos despois do seu pasamento, seus netos farían partícipes do
desfrute desas películas os rapaces do barrio da Rúa Concepción Arenal, que as
visionaban no “Cuarto Novo”, como sempre lle chamou á familia, onde Joaquín
tivera seu estudo fotográfico.
A súa actividade artística non remataba coa fotografía e tamén pintou
cadros ao óleo. A súa filla Consuelo García Ferreira conserva un autorretrato,
en miniatura, de seu pai, formato ovoide (13,7 x 10,3 cm), asinado por el, en
data 25 de maio de 1916, e un Cristo xacente, dun tamaño de 24 x 10cm, datado
en 1921.
Joaquín García Portela era unha persoa afable, sosegada e de bo talante, e
o mesmo tempo, ávido de acadar novos coñecementos. “Se houbese moitas persoas como el, non habería guerras”,
referiunos en máis dunha ocasión o seu xenro Jesús Martínez Ramírez, quen tamén
chegou a colaborar co motivo dalgún encargo fotográfico que requiría facer un
desprazamento fora da vila da Guarda.
Enrique Vicente García, neto de Joaquín García, lembra que “(...) o noso avó Joaquín era un home de
paz, tranquilo. Ainda que, ao mellor, de cando en vez, dicía un chiste.
Gustáballe moito escoitar na
radio Recuerdo florido (...)”. Ese
tema musical, coñecido tamén como Souvenir
fleuri, é un vals de Rafael Rossi (1896–1982), bandoneonista, director e compositor arxentino.
Joaquín
García tamén era unha persoa moi respectuosa cos animais. Nunha ocasión, saíron
a dar un paseo el e seu xenro, Jesús. Cando chegaron á fonte e lavadoiro dos
Casás, detivéronse a descansar, sentados nunha pedra que alí había. Nun intre
dado Joaquín viu unha ra no pavimento da estrada e vendo que desde As Loucenzas
viña un vehículo en dirección á vila da Guarda, apartou a ra para que non fose atropelada polo automóbil.
Era
incapaz de ver sufrir tanto as persoas como os animais. A súa familia lembra que non lle gustaba estar na
casa o día da matanza do porco. Por iso, antes de dar comezo ás tarefas
habituais nesas datas, Joaquín collía súa cámara e saía cos seus netos, a facer
fotos por varios lugares do entorno da Guarda, como os muíños de
vento, a Casa de Baños, Fedorento, A Ribeira,… Non quería escoitar os gruñidos
do probe animal.
Dentro da súa modestia Joaquín García era unha persoa culta. Relacionouse,
sobre todo, por razón da súa dilatada labor como chofer privado do indiano
guardés Manuel Otero, con persoas que frecuentaban o Gran Hotel de Mondariz
Balneario, un establecemento dos máis selectos, non só de Galicia, senón de
todo o estado español. Un lugar cun ambiente de encanto, tradición, acougo e
luxo, que era encontro de artistas, políticos, pensadores ou persoas especiais,
como Emilia Pardo Bazán, Castelao, Wenceslao Fernández Flórez ou a Infanta
Isabel de Borbón, entre outras.
Asemade, Joaquín García tamén tivo moita relación tanto profesional como
persoal, con Prudencio Vicente Vicente, tamén fotógrafo, director de Casa
Táboas, un dos establecementos máis importantes da Guarda, con moito traballo
no taller tipográfico (imprenta) e papelería, ademais doutras actividades
mercantís. Proba diso e que na Tipografía La Concepción, propiedade
de Vicente Vicente Táboas, e situada na Praza de Ignacio Sobrino, nº 6,
imprimíase o semanario La Voz del Tecla (1911-1920), así
como postais do Monte Santa Trega, folletos, facturas, etc..
Joaquín García, sabía ler e escribir. Por certo, con unha fermosa
caligrafía. Compre relembrar que saber ler, escribir, e as “catro regras”, é
dicir; sumar, restar, multiplicar e dividir, aínda sendo hoxe en día moi
elemental, daquela non toda a cidadanía tiña eses coñecementos. De tal xeito
que por aquel entón era moi alta a porcentaxe de analfabetismo total existente,
non so no municipio da Guarda, senón en todo o estado español.
Ademáis, Joaquín García posuía carnet de conducir e dispuña de aparello de
radio na súa casa, polo cal pagaba o correspondente imposto como usuario de
receptor de radio, estando o día das informacións nacionais e internacionais.
Era unha persoa sobria, tanto na comida como na bebida. Gustábanlle os
dátiles, e por iso ese froito da palmeira datileira, non faltaba na mesa de
cada Nadal da súa familia. Costume que coma homenaxe a súa lembranza, continuaron
súa filla Celia e seu xenro Jesús. E hoxe en día, súas netas Joaquina e Celia,
conservan esa tradición familiar.
Como fotógrafo non era unha persoa aferrada os cartos, xa que Joaquín,
mesmo adoitaba non cobrar algúns traballos, sabendo da carencia de medios
económicos de algunhas persoas humildes. Seus familiares referíronnos que nunha
ocasión, entre outras moitas semellantes, unha muller de Burgueira pasou a
recoller 4 fotos que lle custaban un peso (5 pesetas), é a paisana díxolle a
Joaquín: “Non teño máis que catro
pesetiñas”. E el respondeulle con toda humildade: “Mira, lévaas e cómpralle pan para teus fillos, que eu aínda teño pan
para comer”.
En definitiva, non so foi un fotógrafo que gustaba da súa profesión, senón
unha persoa traballadora, sensible e con inquedanzas culturais que deixou
gratas lembranzas na memoria de tódalas persoas que o coñeceron.
Ricardo Rodríguez Vicente
Ningún comentario:
Publicar un comentario