PONTEVEDRA

UXÍO BENÍTEZ ANUNCIA QUE A DEPUTACIÓN DE PONTEVEDRA IMPULSARÁ UN ‘PLAN MÓVESE 2’ DE CALMADO DE TRÁFICO 

PARA DAR RESPOSTA ÁS DEMANDAS DE CONCELLOS E VECIÑANZA  

O deputado de Mobilidade subliña que a primeira fase do plan foi “moi satisfactoria”en todos oslugares onde se instalaron os ‘lombos’, a excepción das queixas en Pontevedra  

“Nunca unha administración executara unha actuación tan ambiciosa con medidas directas para aumentar a seguranza viaria”, asegurou o nacionalista  

Uxío Benítez Fernández, deputado de Mobilidade

Fotos: D.P.

Infogauda / Pontevedra

 O deputado de Mobilidade Uxío Benítez Fernández anunciou hoxe que a Deputación de Pontevedra vai impulsar un ‘Plan de Mobilidade e Velocidade Segura 2’ (MÓVESE) para a instalación de novos elementos de calmado de tráfico, ‘lombos’ e redutores de velocidade, nas vías da rede provincial. Esta nova actuación, “moi ambiciosa” en palabras do nacionalista, vaise poñer en marcha debido á alta demanda por parte dos concellos e da propia veciñanza da provincia.  

GONDOMAR EP 2303. PK 0+080-3

 Benítez explicou que o departamento de Mobilidade está a remitir unha comunicación aos concellos para que, nas vindeiras semanas, alcaldesas e alcaldes transmitan información sobre as zonas das estradas provinciais nas que consideran se deben acometer máis actuacións de calmado de tráfico.  Será o persoal técnico da Deputación quen definirá despois cales serán os dispositivos a implantar, as distancias entre eles e o seu emprazamento máis axeitado. 

 O investimento neste novo Plan Móvese e os prazos de execución concretaranse unha vez se coñezan as necesidades reais. En calquera caso, Benítez destacou que dado que a seguranza viaria é un obxectivo estratéxico do novo goberno da Deputación a intención é “dar resposta á demanda de xeito moi ambicioso e cunha grande aposta, igual que na primeira fase”.   

PONTEAREAS EP 4005. PK 10+300-4

 O deputado realizou unha valoración da resposta social ante o Plan Móvese que está en marcha e cualificouna de “moi positivo e satisfactoria”. Asegurou que “a realidade é que hai máis dun 90% de satisfacción nos lugares onde se colocaron dispositivos de calmado de tráfico”. De feito, explicou que o único punto onde houbo unha movemento contrario á súa instalación foi no municipio de Pontevedra, “que foi o único lugar onde nos atopamos cunha problemática que, supoño, responde a cuestións de índole política ou cuestións de índole máis rara, pero a realidade é que no resto da provincia podemos transmitir unha grande satisfacción e unha grande demanda de máis dispositivos”, puntualizou.   

 Fin de obra en xaneiro de 2018 

 Benítez explicou que o departamento de Mobilidade ten xa no seu haber máis de medio centro de peticións de ‘lombos’ e redutores de velocidade de concellos e persoas particulares-recollidas nas últimas semanas a pesares de non ter aberto oficialmente ningún prazo de solicitude-. Así mesmo, dixo que no desenvolvemento das obras actuais incluso foi necesario aumentar o número de dispositivo de calmado de tráfico previstos nun reaxuste de reforzo polas constantes peticións. Puxo como exemplo que no contrato correspondente á área de O Morrazo e Pontevedra pasouse de 206 a 228 dispositivos os executados. 

CANGAS EP 1001. PK 1+300-3

O ROSAL EP 3302. PK 2+860-2

 En canto á finalización da primeira fase do Plan Móvese, Benítez explicou que os catro contratos (Pontevedra-Morrazo, Vigo, Baixo Miño-Condado-Paradanta, e Deza-Caldas-O Salnés) teñen un nivel de execución de entre o 85 e o 90%, coa previsión de rematar as actuacións a finais de xaneiro de 2018 salvo que se produzan complicacións por cuestións de climatoloxía.  

REDONDELA EP 2901. PK 2+070-6

 O deputado lembrou que a primeira fase do Plan Móvese tivo un orzamento global de preto de case catro millóns de euros, e insistiu na dificultade e complexidade de abordar actuacións puntuais en estradas e concellos tan dispersos, con características moi diferentes en función das vías. “Isto serviunos de aprendizaxe e tiramos conclusións, xa que non é o mesmo abordar obras en moitos lugares a un tempo que unhaobra sexa nunha única localización”, dixo, para finalizar asegurando que “nunca se fixo unha actuación global tan ambiciosa para aumentar a seguranza viaria con medidas directas de calmado de tráfico por parte dunha administración”.