26 set, 2016

CULTURA

Valentín García inaugura en Vigo o XI ciclo 'Escritores na Universidade' 

Este ciclo de mesas redondas é froito da colaboración da Secretaría Xeral de Política Lingüística coa Asociación de Escritores en Lingua Galega e a Facultade de Filoloxía e Tradución da Universidade de Vigo

O secretario xeral de Política Lingüística en funcións da Xunta de Galicia, Valentín García Gómez, participou este mediodía en Vigo na inauguración do XI Ciclo de mesas redondas 'Escritores na Universidade' 

Infogauda / Vigo

 O secretario xeral de Política Lingüística en funcións da Xunta de Galicia, Valentín García Gómez, participou este mediodía en Vigo na inauguración do XI Ciclo de mesas redondas 'Escritores na Universidade' que se celebra desde hoxe, Día Europeo das Linguas, e ata o 19 de outubro na Facultade de Filoloxía e Tradución da Universidade de Vigo, centrado na temática 'Teoría de contrarios'.
 García Gómez destacou a boa saúde da literatura galega e a calidade excepcional dos seus autores e valorou ambos como “factores prestixiadores do idioma galego que deben seguir actuando mentres se incorporan outros novos, como o uso na investigación e divulgación científica ou o valor no mercado laboral”. Neste sentido, sinalou que “unha xornada coma a de hoxe, Día Europeo das Linguas, orientada a potenciar a diversidade lingüística do noso continente, semella especialmente adecuada para botar a andar unha iniciativa coma a que nos reúne aquí, que aspira a divulgar a literatura en galego”.
 Acompañaron o secretario xeral na mesa inaugural Cesáreo Sánchez, presidente da Asociación de Escritores en Lingua Galega (AELG); Rexina Vega, profesora da Facultade de Filoloxía e Tradución, coordinadora do ciclo e integrante da AELG; Beatriz Rodríguez, vicedecana de Calidade da Facultade de Filoloxía e Tradución; Xosé Henrique Costas, director do departamento de Filoloxía Galega.

 I Ciclo 'Escritores na Universidade' desenvolverase ao longo dos meses de setembro e de outubro baixo o título xeral de “Teoría de contrarios”. Na primeira das súas mesas redondas, celebrada hoxe, interviñeron Susana Sánchez Arins e Xesús Constela, quen, baixo o título “Literatura e/ou mercado?”, reflexionaron sobre o concepto de gran público no sistema literario galego.
 O próximo 5 de outubro, ás 10:00 h, o salón de actos da Facultade de Filoloxía e Tradución acollerá a mesa “Poesía ou performance?”, no curso da cal Iolanda Zúñiga e Silvia Penas tratarán dos límites difusos entre ambas. Na mesma hora e lugar celebrarase, o 19 de outubro, a derradeira mesa de debate, “Drama ou posdrama?”, coa intervención de Avelina Pérez e de Manuel Lourenzo, que se ocuparán da vixencia do drama e do posdrama no relato teatral contemporáneo.
 A entrada é libre en todos os casos e o programa completo pódese consultar premendo eiquí.
Colaboración coa Asociación de Escritores da Lingua Galega
'Escritores na Universidade' é unha iniciativa da AELG en colaboración coa Facultade de Filoloxía e Tradución da Universidade de Vigo e da Consellería de Cultura e Educación a través da Secretaría Xeral de Política Lingüística.

 A Consellería, mediante un convenio de colaboración, apoia esta e outras actividades da AELG que inciden na difusión da obra dos escritores en lingua galega, como as visitas de escritores a Centros de Estudos Galegos dependentes da Secretaría Xeral de Política Lingüística, o II Ciclo de Literatura Infantil e Xuvenil que se celebra na Facultade de Ciencias da Educación de Ourense (Universidade de Vigo) ou o XIII Curso de formación continua 'As literaturas infantís e xuvenís ibéricas. A súa influencia na formación lectora'.

PONTEVEDRA

Máis de 150 persoas maiores da provincia participan a próxima semana no programa "Depotermal" da Deputación 

Un total de 76 persoas farán uso da modalidade con aloxamento no Spa Torre do Deza e no Talaso Atlántico de Oia, mentres que 88 asistirán de día a Mondariz, Oia e A Toxa 


Infogauda / Pontevedra

 Máis de 150 persoas maiores da provincia participarán ao longo da semana que vén no programa "Depotermal" da Deputación de Pontevedra, que promove o envellecemento activo e a mellora da calidade de vida das persoas de idade. Trátase dunha iniciativa, que se desenvolve entre setembro e decembro, da que se benefician máis de 4.000 maiores da provincia, a través de estancias en establecementos termais coa modalidade só diúrna ou con aloxamento completo.  

 Dende onte día 25 de setembro ata o venres 30, un total de 76 maiores gozarán dunha estancia completa no Talaso Atlántico de Oia e no Spa Torre do Deza en Lalín. Todos eles e elas proveñen dos concellos de Vigo, Nigrán, Poio, Pontevedra e A Lama. Ademais dos tratamentos termais nos establecementos correspondentes, realizarán visitas e saídas para coñecer o entorno natural e histórico de cada zona.   

 Durante esta semana, do luns 26 ao venres 30 de setembro, un total de 88 maiores da provincia aproveitaranse tamén da asistencia diaria, durante cinco días, para gozar dos tratamentos termais nos establecementos de Mondariz, Oia e A Toxa. Estas persoas maiores proveñen dos municipios de Ponte Caldelas, Fornelos de Montes, Redondela e Vigo.   

 Durante este mes e no que queda de ano, máis de 4.000 maiores da provincia gozan do programa "Depotermal" a través das súas dúas modalidades. Un total de 2.855 fano con aloxamento nocturno e 1.431 fan só uso da asistencia diúrna aos establecementos termais. Cómpre salientar que, por primeira vez este ano, reserváronse 434 prazas para persoas con dificultades económicas ou en risco de exclusión, que antes non podían acceder ao programa por motivos económicos.   

 Na modalidade diúrna, os establecementos dispoñibles son Termas de Cuntis, Eurostars Isla da Toxa, Balneario de Mondariz, Talaso Atlántico de Oia, Hotel Nuevo Astur Spa en Vilalonga (Sanxenxo), Notal Marina Spa no Grove, Spa Torre do Deza en Lalín e Spa Vía Argentum en Silleda. Na modalidade con aloxamento están o Balneario de Mondariz, Gran Hotel Talaso en Sanxenxo, Hotel Spa Carlos I en Sanxenxo, Termas de Cuntis, Talaso Atlántico en Oia, Talaso Hotel Louxo A Toxa, Spa Torre do Deza en Lalín e o Hotel Nuevo Astur Spa en Vilalonga (Sanxenxo).

PONTEVEDRA

Asistentes á Conferencia Internacional do Kiwi visitan Areeiro para coñecer as investigacións que se realizan sobre este froito 

Na Estación Fitopatolóxica de Areeiro estase a realizar un intenso traballo para diagnosticar e controlar a propagación da bacteria PSA, que supón a principal causa de perdas a nivel económico no sector do kiwi   



Infogauda / Pontevedra

 Establecer métodos de diagnóstico e de control da bacteria PSA -Pseudomonas syringe actiniadiae- que afecta ás plantacións de kiwi galegas desde o 2011 é unha das principias liñas de investigación que a día de hoxe ten aberta o laboratorio da EFA. E coñecer o estado destas investigacións foi o obxectivo principal da visita que esta mañá realizaron ás instalacións de Areeiro máis de 60 persoas que participarán a vindeira semana na 35 Conferencia Internacional do Kiwi.  

 As enfermidades de orixe bacteriano no cultivo do kiwi son a primeira causa de perdas económicas, principalmente o cancro bacteriano causado pola bacteria PSA, polo que desde a EFA estase a traballar activamente na súa caracterización, bioloxía, métodos de diagnóstico e de control. A esta investigación súmanse os estudos agronómicos, e en especial fitopatolóxicos, que permiten dar conta do estado sanitario das plantacións, e que tamén se amosaron no percorrido desta mañá. Esta visita forma parte das actividades previas á conferencia que terá lugar os días 26 e 27 na Illa da Toxa e que contará coa participación de representantes dos países da  IKO -International Kiwifruit Organitation-: Francia, Italia, España, Grecia, Estados Unidos, Nova Zelandia, Corea e Chile.  

 Desde o inicio da actividade da EFA en 1980, o estudo da patoloxía do kiwi foi unha das úas liñas prioritarias. Este cultivo fora iniciado na Galiza en 1960, e a día de hoxe a produción de kiwi galega supón o 80% da produción total do Estado, mentres que a superficie dedicada a este cultivo sitúase no 70%. Debido á demanda dos kiwicultores e dos viveiristas para dispoñer de material vexetal adecuado para as plantacións comerciais, iniciouse un programa de caracterización morfolóxica, xenética e agronómica de plantas estaminíferas e pistiliferas de kiwi. Outra das liñas de estudo, é a mellora das propiedades organolépticas relacionadas coa textura e dozura do froito maduro, polo que na EFA tamén se están realizando estudos sobre a evolución dos parámetros organolépticos durante o ciclo vexetativo. En colaboración con algunhas empresas do sector, estase a facer un seguimento da fenoloxía de diversas plantacións co obxectivo de caracterizar o seu ciclo vexetativo e determinar o momento óptimo da aplicación de fertilizantes, produtos fitosanitarios e reguladores, poda, anelado, apoio da polinización e aclareo. Por último, tamén se realizan estudos para mellorar o tamaño do froito e o número de froitos por planta, coa aplicación de diversas substancias para mellorar o calibre, con distintas técnicas de cultivo e coa aportación de polen.   

A bacteria PSA  
 Esta bacteria, que foi detectada por primeira vez en Xapón e Corea en 1984, constitúe na actualidade unha enfermidade emerxente que está ocasionado importantes perdas en China, Italia, Nova Zelandia, Francia, Portugal e Chile. É no 2008 cando cobra importancia debido aos danos producidos nas plantacións italianas, por un tipo de cepa moi virulenta que foi denominada PSA-3. A partires desta data, a enfermidade propágase de forma moi rápida a zonas produtoras de todo o mundo e mostrando, ademais, unha gran capacidade de adaptación ao ambiente e unha gran variabilidade, o que dificulta a súa identificación.  

 Desde a aparición da bacteria en Italia, realízanse mostreos periódicos para comprobar a presenza da enfermidade e no 2011 detéctase por primeira vez en Galiza, constituíndo a primeira referencia no Estado. Desde o momento da detección da bacteria en cultivos galegos,, desde Areeiro desenvólvense diferentes liñas de traballo que inclúen a mostra e caracterización dos illados obtidos nas plantacións galegas, a posta a punto de protocolos para a detección da bacteria, e o estudo da enfermidade e a súa epidemioloxía a través do seu ciclo biolóxico, insectos implicados na súa transmisión e alternativas de control. Tamén se traballa na detección e caracterización dunha nova poboación de baixa virulencia, en ensaios de campo para evitar a disenimación da enfermidade. A EFA participa, ademais, en proxectos internacionais relacionados co estudo da bacteria, así como con revistas especializadas divulgando os estudos realizados até o momento.

PONTEVEDRA

O programa "Conectadas 2016" inicia esta semana 17 obradoiros en 12 concellos da provincia 

A iniciativa de Igualdade ten como obxectivo potenciar a participación e promoción das mulleres e mellorar a súa formación básica 


Infogauda / Pontevedra

 O programa de Igualdade "Conectadas 2016" inicia esta semana, entre os días 26 de setembro e 2 de outubro, 17 novos obradoiros repartidos entre 12 concellos da provincia: Campo Lameiro, Cuntis, A Estrada (catro obradoiros), Lalín, Meis, Mos, Ponteareas (dous), Pontecesures, Sanxenxo, Tomiño (outros dous), Vilaboa e Vila de Cruces.  

 Estes obradoiros do programa elaborado polo servizo de Igualdade da Deputación de Pontevedra recollen temáticas moi diversas, que van dende as actividades físicas (zumba, ioga, ximnasia de mantemento), pasando pola artesanía e manualidades (traballos en tea, coiro, madeira e outros; costura creativa; iniciación á costura) ou a alimentación (conservación de alimentos, conservas artesanais; cociña e alimentación: hábitos saudables; tapas, petiscos e canapés), así como alfabetización dixital (fotografía e edición) e psicoloxía (risoterapia, mindfulness), entre outros.  

 Desde a Deputación de Pontevedra lembran que "Conectadas 2016" ten como obxectivo potenciar a participación e promoción das mulleres, mellorar a súa formación básica e favorecer as relacións interpersoais en igualdade, así como o intercambio de experiencias. Faino mediante accións formativas e coa incorporación de maneira transversal dos principios de igualdade, corresponsabilidade e conciliación nos distintos eidos persoal, laboral e familiar. Ademais, tamén pretende contribuír á mellora da empregabilidade das mulleres e o seu mantemento no mercado de traballo, reducindo a brecha dixital mediante o emprego da información e as novas tecnoloxías.  

 As actividades estanse a realizar ao longo de 60 concellos da provincia e son máis de 5.000 alumnas e alumnos os que se beneficiarán en total do programa. Cada un dos cursos ten unha duración de 35 horas e precisa un mínimo de 15 persoas participantes, organizándose en grupos de entre 20 e 25 persoas como máximo e con preferencia ás mulleres. Só un 25% das prazas se reservan para homes, agás no caso dos cursos relacionados coa cociña e alimentación, onde a distribución de prazas está a ser mixta.  

 "Conectadas 2016" é unha iniciativa desenvolvida polo servizo de Igualdade da Deputación de Pontevedra. Esta área, que se creou por primeira vez esta lexislatura, ten como finalidade funcionar non como un departamento independente, senón integrado nas distintas áreas da institución provincial para implantar criterios de Igualdade entre mulleres e homes en todas as iniciativas que se desenvolven dende a institución provincial.

CINEMA

O premiado filme "El hijo de Saúl" centra no CGAI unha nova entrega da sección "Contexto" 

O filme gañador do Oscar á mellor película en fala non inglesa ponse en relación con ‘El nome de los árboles’ e ‘La imagen perdida’ como distintas formas de abordar desde o cinema a represión e o exterminio

As proxeccións, en sesión dobre, terán lugar os próximos tres martes na sede coruñesa do Centro Galego de Artes da Imaxe

Fotograma do filme ‘El hijo de Saúl’

Infogauda / A Coruña

 O Centro Galego de Artes da Imaxe (CGAI-Fimoteca de Galicia) abordará a representación cinematográfica da represión e do exterminio a través dunha nova entrega da súa sección ‘Contexto’, que desta volta xirará arredor do premiado filme de László Nemes ‘El hijo de Saúl’. Xunto con esta produción húngara de 2015, gañadora do Oscar á mellor película en fala non inglesa, programaranse os documentais ‘El nome de los árboles’, do director asturiano Ramón Lluis Bande, e ‘La imagen perdida’, do cambodiano Rithy Panh.
 O CGAI puxo en marcha este ciclo co obxectivo de confrontar destacados títulos actuais con outros clásicos ou contemporáneos desde diferentes puntos de vista, como o temático, o estilístico ou o ambiental. Neste caso, ‘O fillo de Saúl’ dá pé a un novo contexto a partir da súa ollada pouco habitual sobre o campo de concentración de Auschwitz. A longametraxe foi tamén merecedora do gran premio do xurado e do Fipresci de Cannes e do Globo de Ouro á mellor película en fala non inglesa, ademais de recibir o recoñecemento da crítica e de profesionais como o francés Claude Lanzmann, director do célebre documental sobre o Holocausto ‘Shoah’.

Os lugares da memoria

 ‘El hijo de Saúl’, que será proxectada en 35 mm, centrará o 11 de outubro a última das tres xornadas deste novo ‘Contexto’, que dará comezo mañá con ‘El nome de los árboles’. Neste documental de 2015 sobre a volta aos lugares da memoria, Ramón LLuis Bande acompaña as testemuñas da represión franquista en Asturias mentres comparten con el as súas lembranzas.
 O 4 de outubro será a quenda de ‘La imagen perdida’, unha produción cambodiano-francesa premiada en 2013 na sección ‘Un Certain Regard’ de Cannes. O seu director buscaba amosar as atrocidades da ditadura de Pol Pot no seu país, época durante a que desapareceu parte da súa propia familia. Ao non atopar ningunha imaxe real que puidera ilustrar este cruel período, Rithy Panh optou por unha proposta estética fóra do común, empregando figuras de plastilina e dioramas para narrar este pesadelo.
 Os tres filmes proxectaranse na sede coruñesa do Centro Galego de Artes da Imaxe en sesión dobre, ás 18.00 e ás 20.30 horas.

BAIXO MIÑO

O PARTIDO POPULAR REVALIDA SÚA MAIORÍA ABSOLUTA

Alberto Núñez Feijoó voltará a presidir o Goberno da Xunta de Galicia


Infogauda / Baixo Miño

 Con unha colleita de 676.676 votos, fronte os 661.281, que acadou en 2012, o Partido Popular foi o que máis respaldo obtivo nas Eleccions Autonómicas celebradas en Galicia, este domingo día 25 de setembro, acadando 41 escanos, de un total de 75 deputados a elexir. Polo tanto, ainda que son datos provisorios, corresponderalle a Alberto Núñez Feijóo, candidato do PP á presidencia da Xunta de Galicia, formar goberno, logo da constitución do novo Parlamento Autonómico galego.

 A seguinte formación, foi En Marea, que acadou 271.418 votos, o que lles da unha representación de 14 parlamentarios.

 En terceira posición quedou o PSdeG-PSOE, que acadou 254.552 votos, que terá tamén 14 escanos. En 2012 había acadado 18 actas de parlamentarios.

 En cuarta posición quedou o BNG-Nós, que acadou 118.982 votos, que terá 6 deputados. Un menos, que en 2012, cando acadara 146.027 votos.

 No que respecta os concellos do Baixo Miño, os resultados foron os seguintes:

A Guarda
PP 2.527 votos (en 2012 obtivera 2.593); En Marea 1.059 votos; PSdeG-PSOE 756 votos (en 2012 tivera 1.037 votos); BNG-Nós 724 votos (en 2012 tivera 676); C´s 186 votos.

O Rosal
PP 1.570 votos (en 2012 obtivera 1.741); En Marea 675 votos; PSdeG-PSOE 527 votos; BNG-Nós 477 votos (en 2012 tivera 524 votos); C´s 92 votos.

Oia
PP 924 votos (en 2012 obtivera 877 votos); PSdeG-PSOE 297 votos (en 2012 acadara 356 votos); En Marea 289 votos; BNG-Nós 132 (en 2012 foran 159 votos); C´s 34 votos.

Tomiño
PP 3.059 votos (en 2012 obtivera 3.382); BNG-Nós 1.229 votos (en 2012 lograra 1.280 votos); En Marea 1.134 votos; PSdeG-PSOE 999 votos (en 2012 lograra 1.089 votos); C´s 211 votos.

Tui
PP 4.302 votos (en 2012 obtivo 4.635 votos); En Marea 1.519 votos; PSdeG-PSOE 1.411 votos (en 2012 lograra 1.264); BNG-Nós 770 votos (en 2012 acada 1.038 votos); C´s 356 votos.

25 set, 2016

A GUARDA

OBRADOIROS NO CENTRO SOCIAL FUSCALHO



C. S. Fuscalho / A Guarda

 Esta é a oferta de obradoiros para este curso 2016-2017. 

 Podedes anotar-vos no Fuscalho, escrevendo ao correio csfuscalho@gmail.com ou chamando aos telefones: 605 789 915 / 647 132 307. 

 Nom duvides em consultar qualquer cousa.  

 E para os que ainda nom vos enterachedes, ainda estádes a tempo de impartir vós mesmos algum obradoiro ou curso. 

 Contacta com nós! 

SEGURIDADE VIAL

VI CONCURSO DE CARTAS Y DIBUJOS ANCAS CORUÑA CALENDARIO 2017  

BASES DEL VI CONCURSO DE CARTAS Y DIBUJO PARA EL CALENDARIO 2017  



QUERID@S… “AHORA VAMOS CAMINANDO AL COLE” Curso escolar 2016-2017  

ORGANIZA: Stop Accidentes Galicia 

COLABORA: Concejalía de Movilidad Sostenible, Concejalía de Educación del Ayuntamiento de A Coruña.  

BASES DEL CONCURSO:  

 Dirigido en años anteriores a los Centros escolares que han implementado el A.N.C.A.S, este año abrimos la convocatoria a TODOS LOS CENTROS ESCOLARES DEL AYUNTAMIENTO DE A CORUÑA para que participen en el concurso de cartas y/o dibujos QUERID@S… “AHORA VAMOS CAMINANDO AL COLE” con el objetivo de promover el camino escolar seguro en todos los centros de la ciudad, impulsando hábitos de movilidad saludables en los desplazamientos cotidianos de los alumnos para fomentar el desplazamiento a pie de niños/as y familiares en sus trayectos escolares.   

Plazos:  

1.       Inscripción de los Centros: de 21 de septiembre al 3 de octubre de 2016.  

2.       Trabajo en el aula: del 3 al 21 de octubre  

3.       Envío y recepción de trabajos preseleccionados por cada Centro (máximo 15): ultimo día 31 de octubre.  

4.       Valoración del Jurado: Stop accidentes y Concejalía de movilidad y Concejalía de Servicios sociales y educación. 
5.       Entrega de premios y diplomas: primera quincena de diciembre 2016 (se coordinará la fecha, lugar y hora con los centros participantes)  

Contamos con vuestra participación: DESCARGA LAS BASES

TURISMO

Turismo de Galicia presenta a oferta turística galega en Xapón a través da feira JATA 

Por sexto ano consecutivo, o destino Galicia ten presenza neste certame que se celebra na capital xaponesa

A cifra de pernoitas dos viaxeiros xaponeses que se achegaron a Galicia nos sete primeiros meses do ano medrou un 10,6% 

Por sexto ano consecutivo, o destino Galicia ten presenza neste certame que se celebra na capital xaponesa

Infogauda / Santiago de Compostela

 A directora de Promoción de Turismo de Galicia, Carmen Pita, encabeza a representación galega que participa na feira JATA Travel Showcase 2016, que se celebra na capital de Xapón e na que a Comunidade galega conta cun espazo para promover a oferta turística galega entre os milleiros de persoas que visitarán este certame.
 JATA é unha feira xeral de turismo que, organizada pola Japan Association on Travel Agents, constitúe un dos certames de maior tradición dentro do mercado nipón. Turismo de Galicia está presente por sexto ano consecutivo.
 Antes da apertura da feira tivo lugar un workshop organizado pola propia feira no que Turismo de Galicia estivo presente con citas cos operadores xaponeses interesados en incluír Galicia nos seus programas, así como de reforzar o contacto cos que xa traballan a nosa Comunidade.
 Por outra parte, durante a feira, a OET en Tokyo organizará un encontro de traballo con operadores, medios de comunicación e profesionais do turismo, acción na que tamén estará presente Galicia.

Destino en alza

 Galicia continúa a ser un destino en alza para o turista xaponés, que aprecia de xeito especial a nosa riqueza cultural e monumental, a gastronomía, a natureza e o Camiño de Santiago.
 Neste ámbito, Turismo de Galicia presentaralles aos operadores turísticos as posibilidades que ofrece Galicia para a organización de viaxes turísticas. Ademais, o público final poderá obter directamente información sobre a oferta turística da comunidade galega.
 O mercado xaponés xerou nos primeiros sete meses deste ano preto de 13.600 pernoitas, cifra que supera nun 10,6% o dato do mesmo período do pasado ano.
 A cifra de viaxeiros xaponeses situouse en algo máis de 8.700 neste período, consolidándose como o primeiro asiático na nosa Comunidade.

24 set, 2016

VILA NOVA DE CERVEIRA

Catro artistas internacionais danse cita no II Simposium de Escultura do Miño Tomiño-Cerveira  

Durante tres semanas os escultores, de Taiwán, Bulgaria e Colombia, traballarán en vivo dentro dun proxecto conxunto de Tomiño e Cerveira  
    
A actividade foi oportuna e oficialmente presentada na Cámara Municipal de Cerveira, polo presidente da Cámara, Fernando Nogueira, a alcaldesa de Tomiño, Sandra González, e a concelleira de Cultura, Cristina Martínez
Foto: C. T.


Infogauda / Vila Nova de Cerveira

 O Simposium Internacional de Escultura do Miño conta na súa segunda edición con catro escultores internacionais que darán forma ás súas obras en vivo, en contacto permanente coa xente que queira achegarse a coñecer o seu traballo. 

 Este ano a cita é en Vila Nova de Cerveira, xunto ao Baluarte de Santa Cruz, desde onte día 23 de setembro e o día 12 de outubro.  

 Con carácter transfronteirizo, a iniciativa pretende desenvolver o intercambio intelectual e profesional entre os artistas participantes e o público, onde os escultores van traballar ao ar libre nun espazo público, coa intención de que todos poidan disfrutar e apreciar a evolución dos traballos, interactuando directamente cos artistas.  

 A actividade foi oportuna e oficialmente presentada na Cámara Municipal de Cerveira, polo presidente da Cámara, Fernando Nogueira, a alcaldesa de Tomiño, Sandra González, e a concelleira de Cultura, Cristina Martínez.  

 Os escultores seleccionados para esta segunda edición, todos de relevo internacional, son o colombiano Fernando Pinto, a búlgara, residente en Tomiño, Liliya Pobornikova, e os taiwaneses Lee, Zih-Cing e Teng, Shan-Chi.  Todos eles crearán as súas obras en grandes bloques de pedra, a maioría mármore, dos que irán sacando formas, volumes e figuras insólitas que sorprenderán ao viandante.  

 As pezas serán logo situadas en lugares estratéxicos de ambas vilas, como se fixera xa na primeira edición, que tivo lugar -lembramos- no ano 2014 no Espazo Fortaleza de Goián.  

 O presidente da Cámara Municipal, Fernando Nogueira, explicou que nesta segunda edición a organización recaerá maiormente en Portugal, xa que na primeira, foi Tomiño quen se ocupou das tarefas loxísticas. 

 Esta vez, o simposium será coordinado por Vítor Reis, tamén escultor e un dos seis participantes da primeira edición.  

 A alcaldesa de Tomiño, Sandra González, pola súa banda, salientou a intención de ambos equipos de goberno de “achegar a arte á rúa”, tendo en conta que tanto Cerveira coma Tomiño son terra de artistas e comparten un patrimonio material e inmaterial común.  

 A concelleira de Cultura de Tomiño, Cristina Martínez, pola súa parte, comentou que o obxectivo deste evento é engalanar os nosos concellos de arte e ao mesmo tempo, afondar na cooperación transfronteiriza. Tamén contribuír á dinamización turístico-cultural dos dous municipios cun evento internacional que se celebrará bianualmente.

TOMIÑO

O segundo Bio-Mercado de Tomiño reunirá este domingo 70 postos de comida, artesanía, cosmética natural, horta, mel,…  
Os praceiros do mercado municipal ofrecerán diferentes tapas, pinchos e pratos especiais a prezos populares Ao longo da xornada haberá distintos talleres e demostracións en vivo; exposicións e sesións de zumba    

A Praza do Seixo e o mercado municipal de Tomiño acollerán este domingo unha nova edición do BIO-MERCADO TOMIÑO
Foto: C.T.

Infogauda / Tomiño

 Este domingo, día 25 de setembro, a Praza do Seixo e o mercado municipal de Tomiño acollerán unha nova edición do BIO-MERCADO TOMIÑO. 

 Setenta postos de comida, artesanía, cosmética, horta ecolóxica, mel e plantas ocuparán a praza principal da vila entre as 11.00 e as 21.00 horas.  

 Ademais, os praceiros do Mercado Municipal ofrecerán degustación de tapas e pinchos a prezos populares. Por 1,50€ será posible probar as Tapas de Mercado en algúns postos (Peixería Chelo; Bacalaos Barcas e O Fogón do Mercado).  

 Asemade poderanse degustar os Sabores do Mercado; por exemplo, en Charcutería Nuria, haberá táboas de queixos e embutidos, e en Horta da Vella e Froitas Berbe, ensaladas e brochetas de froitas con chocolate, nata ou azucre.  

 A presentación do evento tivo lugar no primeiro andar do propio mercado, coa presenza da alcaldesa de Tomiño, Sandra González, o concelleiro de Promoción Económica, Antonio Tartaglione, e o coordinador do evento, Carlos Rodríguez, da empresa Ekohuerta Medicinal.  

 Na oportunidade, Carlos Rodríguez explicou que desta vez se priorizará a oferta gastronómica, aumentando o número de postos de comida, con respecto á primeira edición, aínda que tamén haberá artesanía, antigüidades, produtos de segunda man, etc.  

 Coma novidades, sumaranse tamén postos de horta e plantas, mel, polbo, cosmética natural, cervexa artesá, demostración de cociña vegana e con especias; curso infantil sobre cultivo de horta, traballo artesanal en vivo en madeira, etc.  

 Por outra parte, o bio-mercado contará cunha vertente lúdica e de actividades moi interesantes para adultos e público infantil, como as relacionadas co mundo ECO, que virán complementar a celebración. Haberá ademais un espectáculo de maxia, co mago Zanas; Sesión Vermú co Dúo A Viola, Discomobil e Sesión de Zumba.  

 Dúas mostras porán a nota cultural e divulgativa á xornada do domingo: exposición de fotos antigas de Tomiño, no primeiro andar do mercado, e de minerais, na planta baixa. 

 A alcaldesa de Tomiño, Sandra González, pola súa banda, explicou que a organización do bio-mercado encádrase na estratexia municipal de dinamizar o comercio e a vida social da veciñanza, pondo en valor ao mesmo tempo os espazos públicos.  

 O concelleiro de Promoción Económica, Antonio Tartaglione, indicou que a disposición dos postos foi coidadosamente estudiada para aproveitar o mellor posible o espazo, sen causar molestias aos peóns. Estes poderán circular con tranquilidade, xa que se cortará ao tráfico o acceso á rúa A Guarda.   

CULTURA

O legado de Isla Couto chega á capital de Galicia cunha exposición 

A facultade de Filosofía da USC acolle ata o próximo 21 de outubro a mostra ‘Xaime Isla. Raíz e utopía de Galicia’, que pon en valor a traxectoria do académico, profesor e economista

A facultade de Filosofía da USC acolle ata o próximo 21 de outubro a mostra ‘Xaime Isla. Raíz e utopía de Galicia’, que pon en valor a traxectoria do académico, profesor e economista

Infogauda / Santiago de Compostela

 A exposición 'Xaime Isla. Raíz e utopía de Galicia' chega a Santiago de Compostela para difundir e poñer en valor a traxectoria dun "home que se comprometeu firmemente co proxecto común de construír Galicia e que integrou esa vontade na súa maneira de vivir". Así o asegurou o secretario xeral de Cultura, Anxo Lorenzo, durante a apertura da mostra, á que tamén asistiu o secretario xeral de Política Lingüística, Valentín García, e que tivo lugar na sede da facultade de Filosofía da USC, onde se pode visitar ata o próximo 21 de outubro.
 “Os fitos que inzan a vida de Isla Couto aos que hoxe podemos aproximarnos nesta mostra anímannos a reflexionar neste legado”, dixo Anxo Lorenzo, que tamén tivo palabras de recoñecemento para todo o galeguismo dos tempos difíciles pola súa "constancia e a teima no seu traballo en prol da cultura e da sociedade galega".

Isla Couto


 Membro da Real Academia Galega, avogado, ensaísta e catedrático de universidade, Xaime Isla Couto (Santiago de Compostela, 23 de outubro de 1915 – Vigo, 25 de abril de 2012) foi un dos persoeiros fundamentais no galeguismo político, cultural e económico do século XX. Fundador da Federación de Mocedades Galeguistas, liderou, xunto con Ramón Piñeiro e Francisco Fernández del Riego, en 1950, a creación da Editorial Galaxia. Tamén promoveu a editora SEPT e dirixiu a ‘Revista de Economía de Galicia’ e a ‘Revista Galega de Estudos Agrarios’. Polo seu labor recibiu distinguidos recoñecementos, como a Medalla Castelao (1987), o Premio Trasalba (1992) e a insignia de ouro da Universidade de Santiago de Compostela (2001).

VIVENDA

A Xunta de Galicia adxudica cinco vivendas cedidas por entidades financeiras en varios concellos pontevedreses 

As adxudicacións realizáronse en Vilagarcía de Arousa, Lalín, Nigrán e A Guarda

Infogauda / Pontevedra

 A Comisión Provincial de Vivenda da provincia de Pontevedra propuxo onte a adxudicación dun total de cinco vivendas nos concellos de Vilagarcía de Arousa, Lalín, Nigrán e A Guarda despois de estudar os expedientes e documentación presentada polos solicitantes. No concello de Vilagarcía proponse a adxudicación de dúas vivendas e no resto de concellos unha en cada caso, correspondendo a adxudicación á conselleira de Infraestruturas e Vivenda.
 As vivendas adxudicadas hoxe foron cedidas ao IGVS por Abanca e Sareb e destínanse a realoxos de familias en situación de especial necesidade. A adxudicación realízase en réxime de alugueiro social.

BAIONA

O prazo de execución é de 3 meses e a data límite para a presentación de ofertas é o vindeiro día 19 de outrubro 

O DOG publicou onte a licitación das obras da senda peonil e ciclista na Estrada PO-552, no paseo marítimo de Baiona, por un importe de máis de 182.000 euros 

Esta actuación aproveitará o paseo xa existente, parte da beiravía e a plataforma adoquinada, para construír un novo itinerario, pola marxe dereita da estrada, que permita dividir o tráfico peonil e ciclista  

Este itinerario está enmarcado no Plan de Sendas de Galicia para a comarca de Vigo, que contempla a construción de 11 sendas sustentables e seguras  

Infogauda / Baiona

 A Consellería de Infraestruturas e Vivenda publicou onte no Diario Oficial de Galicia (DOG) a licitación das obras da senda peonil e ciclista na estrada PO-552, na zona do Paseo Marítimo de Baiona.
 Estas actuacións licítanse por un importe de máis de 182.000 euros que serán achegados pola Xunta. O prazo de execución é de 3 meses e a data límite para a presentación de ofertas é o vindeiro día 19 de outubro.
 Estas actuacións están enmarcadas no Plan de Sendas de Galicia para a comarca de Vigo, que contempla un investimento de 2,8 millóns de euros para a construción de 11 sendas sustentables e seguras.
 A fronte marítima da travesía de Baiona conta cun paseo con zonas diferenciadas para o tránsito de peóns e bicicletas, salvo no tramo final, desde o PK 16+400 (acceso porto deportivo) ao 16+650 (glorieta no acceso ao Parador), no que non existe unha plataforma para os diferentes usos. Neste sentido, este proxecto ten por obxecto a remodelación da plataforma existente neste tramo para executar un carril para bicicletas, que permita segregar o tránsito peonil do ciclista.
 Para a súa execución, aproveitarase parte da beiravía e demolerase unha parte do paseo, o que permitirá acadar unha sección tipo: con senda ciclista de 1,8 m e senda peonil de 4 m e con dúas pequenas franxas verdes, para separar a calzada do carril destinado á circulación de bicicletas e este da senda peonil. O carril terá pavimento de pedra, atendendo ao estipulado no Plan especial de protección do Conxunto Histórico Artístico do Concello de Baiona.

LECER

Máis de 600 persoas de 7 concellos da provincia participarán no programa "En ruta coa Depo" esta fin de semana 

O programa, no que participarán preto de 19.000 persoas, ofrece alternativas de lecer dinámico e saudable á vez que fomenta a igualdade de oportunidades para os colectivos con diversidade funcional

Vista parcial de A Guarda, desde o Monte Santa Trega
Fotos: Infogauda

Infogauda / Pontevedra

 "En ruta coa Depo", programa da Deputación de Pontevedra xestionado a través do servizo de Cohesión Social e Xuventude, organiza para esta fin de semana a segunda saída cunha participación de máis de 600 persoas pertencentes a asociacións dos concellos da Guarda, Moaña, Mos, Pontevedra, Redondela, Sanxenxo e Vigo. En concreto, beneficiáronse da segunda saída a Asociación de Mulleres Rurais Santa Tecla (A Guarda), o Club de xubilados e pensionistas Nosa Señora do Carme (Moaña), o Centro Recreativo e Cultural de Torroso (Mos),  a Asociación Cultural Reiriz 2016 A Queimada (Pontevedra), o Centro Social e Cultural de Cedeira e a Cofradía de Pescadores de San Juan (Redondela), o Club de Pensionistas de Sanxenxo e a Asociación de Veciños San Roque (Vigo). 

O Esteiro do río Miño, visto desde o Monte Santa Trega (A Guarda)


 Nesta segunda saída do programa o Centro Social e Cultural de Cedeira, a Cofradía de Pescadores de San Juan  e a Asociación Cultural Reiriz 2016 A Queimada visitará O Grove e a Ría de Arousa; a Asociación de Mulleres Rurais Santa Tecla percorrerá Barro, Portas, Caldas e Cuntis; o Club de xubilados e pensionistas Nosa Señora do Carme coñecerá Silleda e os seus atractivos turísticos; o Centro Recreativo e Cultural de Torroso visitará Catoira, Vilagarcía de Arousa e Cuntis; o Club de Pensionistas de Sanxenxo percorrerá A Guarda e o conxunto histórico de Tui, incluíndo un paseo polo río Miño e a Asociación de Veciños San Roque coñecerá o conxunto histórico de Cambados e a senda fluvial do río Umia en Ribadumia, cunha visita a unha adega da D.O. Rías Baixas.  

 "En ruta coa Depo" conta cun orzamento de 238.500 € e ten como finalidade mellorar a participación, a convivencia e a cohesión social dos distintos colectivos sociais da provincia de Pontevedra a través da promoción da igualdade de oportunidades para os colectivos con diversidade funcional, ofrecendo alternativas de ocio e tempo de lecer dinámico e saudable á poboación xuvenil da provincia así como o asociacionismo xuvenil e, ademais, promovendo rutas destinadas ás entidades de nais e pais que fomenten a convivencia e o intercambio de experiencias nas que participen activamente as nenas e nenos.

TURISMO

A Deputación de Pontevedra amplía os grupos das visitas teatralizadas ao Castelo de Soutomaior ante a súa ampla demanda 

A Presidenta, Carmela Silva, sinalou que xa se esgotaron todas as prazas para as visitas programadas esta semana e a que vén 

Infogauda / Soutomaior

 Turismo Rías Baixas, servizo dependente da Deputación de Pontevedra, vén de ampliar as prazas dos grupos das visitas teatralizadas ao Castelo de Soutomaior, que comezaron onte  e durarán ata o vindeiro 23 de outubro, ante a ampla demanda de solicitudes de participación. Ademais, a Presidenta da Deputación de Pontevedra, Carmela Silva, anunciou esta mañá que "xa se completou o aforo de todas as visitas programadas durante as dúas primeiras semanas" (dende onte 23 de setembro ata o seguinte domingo, 2 de outubro) deste proxecto que, lembrou Silva, "é soamente unha experiencia piloto, o Castelo de Soutomaior merece ter un proxecto máis ambicioso" xa que "non se pode permitir que xunto co de Sobroso estes dous castelos sexan tan descoñecidos para a nosa veciñanza e téñense que converter en dous referentes de atracción turística".  
 Ata o momento xa hai preto de 500 prazas ocupadas nas visitas teatralizadas ao Castelo de Soutomaior, deixando arredor doutras 300 prazas libres dun total de 840 prazas dispoñibles, o que supón un aumento de preto dun 20% das prazas ofertadas inicialmente.  

 As quendas con máis prazas dispoñibles son as dos sábados e domingos ás 11:00 horas, sendo as vespertinas (de xoves a sábado) as de maior demanda. Lembramos que as prazas se poden reservar nos seguintes números de teléfono: 886 21 17 00 e 886 21 17 40.

PONTEVEDRA

Carmela Silva reivindica a capacidade emprendedora, creativa e innovadora da provincia de Pontevedra 

Na apertura de Pont Up Store, en Pontevedra, destacou a importancia de eventos coma este en espazos públicos para darlle visibilidade ao emprendemento  

A presidenta da Deputación de Pontevedra, Carmela Silva, con unha xoven emprendedora
Foto: D. P.


Infogauda / Pontevedra

 A presidenta da Deputación de Pontevedra, Carmela Silva, destacou onte o potencial emprendedor, creativo e innovador da provincia de Pontevedra, "unha provincia chea de futuro, onde hai moitas mulleres e homes con grandes ideas e dispostos a arriscar, a ver o futuro con ilusión. É hora de pasar do temor destes anos de crise a unha situación de ilusión e motivación". Silva fixo estas declaracións na apertura de Pont Up Store, un evento que, no seu terceiro ano, xa se ten convertido no espazo de referencia do emprendemento en Galicia.  

 Silva destacou a importancia de Pont Up Store por ser "unha iniciativa innovadora, por poñer en marcha novas ideas e liderar así a cultura emprendedora na nosa sociedade, algo que por desgraza ata agora no noso país non forma parte do noso ADN". Salientou ademais que se trata dunha iniciativa que nace do acordo de moitas intelixencias, entre as que está o concello de Pontevedra, a Universidade de Vigo a través do Campus Crea de Pontevedra ou a propia Deputación de Pontevedra. "Alégrome de que todas e todos entendamos que o futuro das persoas depende do mundo local e do mundo da cercanía, hoxe en día temos que traballar en que o mundo global se entende dende o mundo local", concluíu. 

 A presidenta resaltou a necesidade de celebrar eventos como Pont Up Store en espazos públicos, como son as rúas de Pontevedra, "xa que son os espazos de todos e todas e son os que nos permiten de verdade visibilizar o talento, a creatividade, o coñecemento e a capacidade de innovación que ten a nosa xente". Silva rematou a súa intervención loando o papel das Universidades públicas, como a UVI impulsora deste foro, que apostan pola innovación e polo emprendemento, "e que están detrás do latexo e do corazón de iniciativas coma esta, que o que fan é achegar as ideas e os proxectos creativos á xente da rúa".  

 Pont Up Store é un evento único, onde se reúnen emprendedores, profesionais, estudantes, empresas, institucións, inversores e público en xeral, xirando todo en torno ao emprendemento e a creatividade. É a terceira edición que se celebra deste foro, que xa se ten consolidado como o espazo de referencia do emprendemento en Galicia. Dende onte pola tarde ata mañá sábado teñen lugar foros, coloquios, charlas, talleres, sesións de networking ou xogos colectivos, entre outras actuacións, sempre xirando en torno ao emprendemento e a creatividade. Preto de 40 proxectos emprendedores preséntanse ademais nos stands do evento, podendo así darse a coñecer, ampliar clientela ou buscar novas vías de financiamento.  

 Entre os proxectos presentes, a presidenta da Deputación destacou o dun grupo de mulleres de Xixón, vítimas de violencia de xénero, que teñen en marcha unha iniciativa, "mostra de que, aínda nas situacións máis difíciles, con ilusión, empeño e apoio se poden sacar adiante ideas e proxectos". Así mesmo, tamén ten un espazo a empresa Kuzunguka, emprazada no viveiro de empresas de Lalín impulsado pola Deputación de Pontevedra, unha empresa de desenvolvemento de aplicacións móbiles, que pretende levar o Internet das cousas ás situacións de mobilidade. 

 Onte pola parte, dende a Deputación tamén se deron a coñecer as novidades do proxecto SmartPeme, unha forte aposta polo uso das novas tecnoloxías para axudar a pemes, autónomos e profesionais a mellorar ou pór en marcha os seus proxectos. Foi no obradoiro "Coñece a rede SmartPeme e comeza a comercializar os teus servizos a través das redes sociais". 

PONTEVEDRA

O Plan Concellos 2016 chega ao 95% de execución con preto de 38 millóns investidos nas vilas da provincia 

Dos 60 municipios da provincia que integran o Plan Concellos, 42 xa teñen completado o 100% das catro liñas de actuación Carmela Silva 


Infogauda / Pontevedra

 O grao de execución do Plan Concellos 2016 sitúase hoxe ao 95% tendo en conta as súas catro liñas de actuación (1 de investimentos; 2 de gastos correntes, amortización e pagamento de débedas; 3 de actividades deportivas, culturais, musicais e medioambientais e 4 de plan de emprego). As liñas 2, 3 e 4 xa están ao 100%, mentres que a liña 1, a única cuxo orzamento inda non se completou, xa se atopa ao 93%. Isto supón que, na actualidade, preto de 38 millóns de euros da Deputación de Pontevedra (37,9 millóns) xa están investidos nos concellos a través deste plan provincial de cooperación coas vilas.  

 Dos 60 concellos da provincia que integran o Plan Concellos (todos agás as cidades de Pontevedra e Vigo, que contan con plans especiais), a día de hoxe hai 52 que xa teñen concedido o 100% das catro liñas e os oito que non o completaron estarán ao 100% nas próximas semanas, xa que a maioría deles están xa agora arredor do 90%. Estes oito concellos son Caldas de Reis, Gondomar, O Grove, A Guarda, Lalín, Marín, Moaña e Ponte Caldelas. A través da Xunta de Goberno e resolucións presidenciais, a institución provincial está a traballar para aprobar o 100% das axudas integradas no Plan Concellos 2016 nas vindeiras semanas.  

 O Plan Concellos 2016, a día de hoxe, leva investidos 38 millóns de euros, dos 40 millóns previstos, nos 60 municipios da provincia incluídos neste plan provincial. Só queda por completar a liña 1 de investimentos, que se atopa xa ao 93% con 25,5 millóns de euros destinados para investimentos nos  municipios.  

 Dentro das políticas de apoio aos concellos dende a institución provincial, cómpre lembrar ademais que aos 40 millóns de euros do Plan Concellos 2016 lles hai que sumar todas as axudas dos distintos servizos provinciais –servizos sociais, deportes, xuventude ou cultura, entre outros–. Deste xeito, sitúase por enriba dos 60 millóns de euros a cifra total de investimentos este ano nos concellos da provincia.

PONTEVEDRA

Carmela Silva presentou o Plan de Usos e viabilidade do castelo de Sobroso 

A Deputación de Pontevedra investirá no castelo durante este e o vindeiro ano máis dun millón de €  

A presidenta da Deputación de Pontevedra, Carmela Silva, presentou as actuacións que se acometerán no castelo de Sobroso
Foto: D. P.

Infogauda / Pontevedra

 A presidenta da Deputación de Pontevedra, Carmela Silva, tan so unha semana despois de dar a coñecer o Plan de Usos e Viabilidade do castelo de Soutomaior, presentou as actuacións que se acometerán no de Sobroso. En total, este ano e o vindeiro, a institución provincial destinará máis dun millón de euros para dinamizar e poñer en valor o castelo. 

 Carmela Silva subliñou que "o estado de mantemento e xestión do castelo de Sobroso demandaba unha intervención urxente xa que, pese a ser un elemento emblemático do noso patrimonio, a capacidade de atracción de visitantes era moi limitada". Para dar resposta a esta situación, Silva engadiu que "nos propuxemos levar a cabo un plan ambicioso que permitise incrementar o número de visitantes definindo un novo posicionamento e marco de xestión que mellore o produto actual, defina o seu novo papel, oferte un novo produto de turismo cultural e optimice o seu rendemento".  

 A presidenta da Deputación, Carmela Silva, subliñou que para poder levar a cabo esta actuación realizouse "unha análise da situación actual das instalacións, dos servizos prestados e do uso do castelo, tendo tamén en conta a opinión das persoas vinculadas coa xestión dos mesmos, co propio concello de Ponteareas, e os modelos europeos de similares instalacións, para propor unha intervención adecuada para Sobroso".   

 O resultado do estudo da Deputación de Pontevedra é un Plan de Usos e Viabilidade que supón un novo réxime de funcionamento e xestión para o castelo, para convertelo nun produto de turismo cultural e de lecer, que recolle unha estimación dos investimentos necesarios, dos custos de funcionamento e das perspectivas de ingresos para unha xestión integral dos novos usos. A través deste Plan de Usos e Viabilidade se determina –tal e como destacou Carmela Silva- " un modelo de produto para o castelo de Sobroso que non é outro que o de configurar un espazo de turismo cultural e natural".  

 As actuacións propostas para Sobroso teñen por obxectivo, tal e como indicou Silva, "aumentar a calidade na atención ó visitante así como nos recursos naturais, culturais e servizos prestados a través da naturalización da súa contorna; da rehabilitación da aula da natureza; de fortalecer, ampliar e mellorar a exposición; impulsar un proxecto arqueolóxico sobre a torre vixía do castelo; promover un proxecto de interpretación e musealización que inclúa a musealización da torre da homenaxe e a ampliación da exposición, dotándoa dun espazo para reunións, vídeo e conferencias así como a rehabilitación do servizo de cafetería".   

 En concreto, as accións estarán centradas na preparación do castelo de Sobroso como foco de atracción cultural e natural e en reforzar a aula de natureza e o valor histórico-cultural do mesmo.  No caso da preparación do castelo como atractivo cultural e natural, impulsaranse demolicións de gaiolas e cercados, recuperarase o entorno da torre vixía e os accesos e, xa en curso, levarase a cabo a naturalización do entorno forestal e os xardíns e a sinalización do recinto. Para impulsar a aula da natureza e o valor histórico-cultural procederase á musealización do castelo, á intervención arqueolóxica sobre a torre vixía e a dotación de servizos adecuados de tenda e cafetería. 

 Carmela Silva subliñou que a partir desta actuación "esperamos difundir os valores culturais e naturais do castelo, ligar as visitas ó recinto con itinerarios complementarios ou exclusivos con distintos fins, aumentar o radio de proxección de determinados valores e servizos para ser máis atractivos así como incrementar o número de visitantes e aumentar a estancia media".   

 O Plan de Usos e Viabilidade do Castelo de Sobroso trátase dun plan "moi ambicioso – segundo manifestou Silva- que levaremos a cabo de forma progresiva; de feito, este ano imos destinar a Sobroso 100.000 € e durante o 2017 600.000 €, ós que hai que engadir os 315.000 € en obras de restauración do castelo que se están realizando en colaboración co concello".  Neste contexto, no marco da colaboración con Ponteareas para a posta en valor do recinto, a Xunta de Goberno da Deputación de Pontevedra vén de aprobar a autorización da redacción do proxecto modificado das obras complementarias de conservación do castelo de Sobroso por unha contía de 12.568,15 €, que hai que sumar ós 56.000 € recentemente aprobados para completar o convenio inicial para a correcta rehabilitación do castelo".