MANUEL ÁNGEL POMBAL DIEGO "PEQUE" SERÁ HOMENAXEADO CO GALLO DO DÍA DAS LETRAS GALEGAS, 2013
Infogauda / A Guarda
A asamblea da Agrupación Cultural Guardesa acordou elexir á Manuel Ángel Pombal Diego para ser homenaxeado co gallo do Día das Letras Galegas, 2013.
O acto da homenaxe será o venres día 24 de maio, ás 9 da noite, no Centro Cultural e Social de A Guarda. Falará sobre Manuel Ángel Pombal, Antón Ferreira Lorenzo.
Como ven sendo tradicional a Agrupación Cultural Guardesa entregará nese acto un pequeno libriño homenaxe.
O evento contará tamén coas actuacións do Grupo de Pandeiretas da Agrupación Cultural Guardesa, o Grupo Antorcha, e a Banda da Escola de Música de Mougás.
Reseña curricular de Manuel Ángel Pombal Diego
Manuel Ángel Pombal Diego, veciño da
parroquia de Pedornes (concello de Oia) é doutor en Bioloxía, e profesor e
investigador na Área de Bioloxía Celular da Facultade de Bioloxía da
Universidade de Vigo.
Como investigador ten publicados máis de
40 artigos de investigación, a maioría deles relacionados co sistema nervioso
da lamprea. Participou en 20 proxectos de investigación, sendo investigador
principal en 12 deles. Asistiu a máis de 55 congresos e reunións científicas nas
que presentou máis de 90 comunicacións.
Como docente ten publicados 5 artigos e participou
en 9 congresos, nos que presentou 7 comunicacións, destacando a creación, xunto
con dous compañeiros (Manuel Megías e Pilar Molist) dun Atlas Histolóxico Virtual de libre acceso que xa revibe máis de 6.000 visitas diarias.
Comezou a impartir clases prácticas como
bolseiro predoutoral no curso 1991-92 na Universidade de Santiago de
Compostela. Máis tarde, pasou dous anos (1993-1995) como contratado na
Universidade da Coruña. En outubro de 1995 gaña unha praza de Axudante de
Facultade na Universidade de Vigo, obtendo unha praza de Profesor Titular de
Universidade a finais de 1998. O ano seguinte formou o grupo de investigación
denominado “Neurobioloxía de Lampreas” (Neurolam),
do que é investigador principal.
Impartiu máis de 20 conferencias e
participou nunhas 35 actividades de divulgación científica e ambiental,
destacando a súa actividade dentro da Asociación Naturalista Baixo Miño.
É membro de 12 sociedades ou
asociacións, 6 delas internacionais, e revisor científico de 11 revistas,
habendo participado tamén como revisor de proxectos e comunicacións
científicas.
Algunhas das actividades máis
salientables realizadas na súa parroquia son:
No ano 1984 organiza e pon en marcha a
1ª Festa do Magosto que máis tarde se converteu na Semana Cultural de Pedornes.
Desde principios de 1998 forma parte da
Xunta Xestora da Comunidade de Montes Veciñais en Man Común da Parroquia de
Pedornes como secretario durante dous anos, e desde o ano 2004 ocupa un posto
como vocal da mesma.
En 1999, participou e promoveu a
constitución da Asociación de Mariñeiros, Artesanais, Deportivos e Ribeireños
de a Pe “As Orelludas” de Oia, sendo elixido secretario da súa Xunta Directiva,
cargo que ocupou mentres a Asociación se mantivo activa.
Nos anos 1999, 2006 e 2011-2012 formou
parte da Xunta Directiva da Asociación Cultural “San Mamed”, encargada da
organización das festas locais: a Semana Cultural, o Santísimo e a festa do
patrón San Mamed.
Promovida por Manuel Ángel e un grupo de
veciños, en maio de 2004 celebrouse a reunión fundacional da Asociación de
Veciños “A Muruxeira” de Pedornes,sendo desde entón o seu presidente.
En xaneiro de
2005 asinouse a acta fundacional da Mancomunidade de Montes de Oia, sendo o seu
tesoureiro durante todo o tempo que estivo funcionando.
Desde o verán de 2005, forma parte do
grupo de baile tradicional e de pandeireteiras “A Fiada” de Viladesuso, onde
baila, canta e toca o bombo e a pandeireta.
Desde abril de 2007 é socio da
Asociación Naturalista “Baixo Miño” (ANABAM), responsabilizándose dalgúns dos
proxectos que a asociación desenvolve no Baixo Miño ao mesmo tempo que colabora
nas actualizacións da súa páxina web e na súa revista “Carrizal”. Así mesmo,
ostenta o cargo de Vicepresidentede ANABAM desde o 14 de xuño de 2008.
Desde a súa formación a finais de 2008,
forma parte da Charanga de Pedornes, charanga que máis tarde pasou a
denominarse Charanga “A Muruxeira”.
Entre os congresos e simposios que
organizou destaca o “Seminario Internacional Sobre a Lamprea” celebrado en Arbo
en abril de 2012.
Ten tramitado numerosas solicitudes de
subvención a través dos diferentes colectivos e asociacións de Pedornes, tanto
á Deputación de Pontevedra como á Xunta de Galicia e
conseguido financiamento para diversas obras sociais e mobiliario así como para
actividades socio-culturais.
Ten elaborado carteis informativos dos
diferentes eventos que se organizan na parroquia de Pedornes e a súa contorna
que, xunto con breves notas de prensa, sole enviar aos medios de comunicación
máis próximos (páxinas web comarcais, periódicos e radios, principalmente).
Ningún comentario:
Publicar un comentario